उस्मानाबाद जिल्ह्यात ओमीक्रॉनचा एंट्री; चिंता वाढली

उस्मानाबाद :  उस्मानाबाद जिल्ह्यात ओमिक्रॉनचे दोन रुग्ण आढळून आल्याने जिल्ह्यात एकच खळबळ उडाली आहे . बावी ( ता.उस्मानाबाद ) येथे ओमिक्रॉन कोरोना पॉझिटिव्ह दोन रुग्ण आढळून आले आहेत . शारजा येथून तो भारतात आल्यानंतर त्याची विमानतळावर तपासणी करण्यात आली होती . त्यावेळी त्याची चाचणी निगेटिव्ह आली . मात्र उस्मानाबाद जिल्ह्यात आल्यानंतर   त्याची बुधवारी चाचणी पॉझिटिव्ह आली आहे . स्थानिक प्रशासनाने याची दखल घेतली आहे . चार दिवसांपूर्वी त्यांची चाचणी घेण्यात आली होती . त्याचा अहवाल पुणे येथील प्रयोगशाळेत पाठविण्यात आला होता . 

बुधवारी या दोघांचाही अहवाल जिल्हा प्रशासनाला प्राप्त झाला आहे . यामध्ये एकाच कुटुंबातील दोघे कोरोना पॉझिटिव आढळून आल्याने प्रशासनात एकच खळबळ उडाली आहे . दरम्यान नागरिकांनी योग्य ती काळजी घ्यावी . घाबरून जाऊ नये , असे आवाहन जिल्हाधिकारी कौस्तुभ दिवेगावकर यांनी केले आहे . खबरदारीचा उपाय म्हणून बावी गावातील सीमा सील केल्या आहेत . तसेच गावातून इतर ठिकाणी संसर्ग होऊ नये याची प्रशासनाकडून दखल घेतली जात आहे . मराठवाड्यात लातूर येथील ओमिक्रॉन रुग्ण आढळून आल्यानंतर आता उस्मानाबाद जिल्ह्यात ही दोन पॉझिटिव्ह आल्याने चिंता वाढली आहे .