धाराशिव जिल्ह्यातील स्थानिक गुन्हे शाखेच्या पथकाने मोठी कारवाई करत मोटरसायकल चोरीप्रकरणी एक आरोपीस अटक केली असून त्याच्याकडून १० मोटरसायकली जप्त करण्यात आल्या आहेत. या मोटरसायकलींची अंदाजे किंमत तीन लाख रुपये इतकी आहे.
गुप्त माहितीच्या आधारे कारवाई
मा. पोलीस अधीक्षक श्री. संजय जाधव आणि अपर पोलीस अधीक्षक श्री. गौहर हसन यांच्या मार्गदर्शनाखाली स्थानिक गुन्हे शाखेचे पोलीस निरीक्षक श्री. विनोद इज्जपवार यांच्या आदेशावरून सहाय्यक पोलीस निरीक्षक सचिन खटके, अमोल मोरे आणि त्यांच्या सहकाऱ्यांनी ही कारवाई केली.
पथक पेट्रोलिंग करत असताना त्यांना गुप्त बातमीदारामार्फत माहिती मिळाली की, आबा उर्फ अशोक अर्जुन पवार (रा. उमरा, ता. कळंब, जि. धाराशिव) हा धाराशिव आणि इतर जिल्ह्यांतून अनेक मोटरसायकली चोरून आणत असून, सध्या तो कळंब येथे आहे आणि त्याच्याकडे एक चोरीची मोटरसायकल आहे.
अटक आणि चौकशीदरम्यान उघडकीस आलेले प्रकार
मिळालेल्या खात्रीलायक माहितीच्या आधारे पोलिसांनी तत्काळ नमूद ठिकाणी जाऊन आरोपीचा शोध घेतला. तो आढळून आल्यावर त्याला ताब्यात घेण्यात आले. त्याच्याकडे असलेल्या मोटरसायकलबाबत विचारपूस केली असता त्याने उडवाउडवीची उत्तरे दिली. अधिक विश्वासात घेऊन चौकशी केल्यावर त्याने ही मोटरसायकल बीड येथून चोरून आणल्याचे कबूल केले.
पुढील तपासणीमध्ये आरोपीने आपल्या चुलता गोविंद व्यंकट पवार याच्यासोबत मिळून अनेक मोटरसायकली चोरी केल्याची कबुली दिली. त्याने उघड केले की त्याच्या घरी आणि तळ्याच्या पाळीशेजारी झाडाझुडपांमध्ये चोरलेल्या मोटरसायकली लपवून ठेवल्या आहेत.
१० मोटरसायकली जप्त, ३ लाखांचा मुद्देमाल हस्तगत
पोलिसांनी घटनास्थळी जाऊन आरोपीच्या सांगण्यावरून लपवून ठेवलेल्या १० मोटरसायकली ताब्यात घेतल्या. पोलिसी नोंद पाहता या मोटरसायकलींची चोरी धाराशिव, बीड, सोलापूर, पुणे आदी ठिकाणी झाल्याचे स्पष्ट झाले. ज्या पोलीस ठाण्यांमध्ये हे गुन्हे दाखल होते, त्यांची माहिती पुढीलप्रमाणे आहे -
धाराशिव शहर पोलीस ठाणे
गु.नं. 47/2025 कलम 303(2)
गु.नं. 125/2024 कलम 379
कळंब पोलीस ठाणे
गु.नं. 367/2024 कलम 379
तुळजापूर पोलीस ठाणे
गु.नं. 13/2025 कलम 303(2)
शिवाजीनगर, बीड पोलीस ठाणे
गु.नं. 154/2021 कलम 379
गेवराई, बीड पोलीस ठाणे
गु.नं. 555/2024 कलम 303(2)
मोहळ, सोलापूर पोलीस ठाणे
गु.नं. 186/2024 कलम 379
विमानतळ (एअरपोर्ट), पुणे शहर पोलीस ठाणे
गु.नं. 34/2025 कलम 303(2)
सिंहगड रोड, पुणे शहर पोलीस ठाणे
गु.नं. 254/2024 कलम 379
स्वारगेट, पुणे शहर पोलीस ठाणे
गु.नं. 283/2024 कलम 379
गुन्ह्यातील पुढील कार्यवाही
या संपूर्ण कारवाईदरम्यान दोन पंचांच्या समक्ष आरोपी आबा उर्फ अशोक अर्जुन पवार याच्याकडून १० मोटरसायकली (एकूण किंमत – ३,००,००० रुपये) जप्त करण्यात आल्या. पुढील तपासासाठी त्याला धाराशिव शहर पोलीस ठाण्याच्या ताब्यात देण्यात आले आहे.
स्थानिक गुन्हे शाखेच्या पथकाची महत्त्वपूर्ण भूमिका
ही यशस्वी कारवाई मा. पोलीस अधीक्षक श्री. संजय जाधव आणि मा. अपर पोलीस अधीक्षक श्री. गौहर हसन यांच्या मार्गदर्शनाखाली करण्यात आली. या मोहिमेत स्थानिक गुन्हे शाखेचे पोलीस निरीक्षक विनोद इज्जपवार, सहाय्यक पोलीस निरीक्षक सचिन खटके, अमोल मोरे, तसेच पोलीस हवालदार जानराव, निंबाळकर, वाघमारे, जाधवर, चालक अरब, दहीहंडे आणि गुरव या कर्मचाऱ्यांचा मोलाचा वाटा राहिला.
नागरिकांना पोलिसांकडून आवाहन
धाराशिव पोलिसांनी नागरिकांना सतर्क राहण्याचे आणि वाहनचोरी रोखण्यासाठी योग्य ती काळजी घेण्याचे आवाहन केले आहे. तसेच कोणाला संशयास्पद व्यक्ती आढळल्यास तातडीने जवळच्या पोलीस ठाण्याशी संपर्क साधण्याचे आवाहन करण्यात आले आहे.
0 Comments