तुळजापूर : शहराच्या बाहेरील बार्शी रोड येथे झालेल्या खून प्रकरणाचा स्थानिक गुन्हे शाखेच्या पोलिसांनी अवघ्या 24 तासांत छडा लावत दोघा आरोपींना अटक केली आहे. या जलद आणि प्रभावी कारवाईमुळे पोलिसांचे कौतुक होत आहे.
घटनेचा तपशील
दि. 5 मार्च 2025 रोजी तुळजापूर बार्शी रोड येथे सत्तार यासीन इनामदार (रा. सिंदफळ) यांचा अज्ञात व्यक्तीने लोखंडी रॉडने डोक्यात मारहाण करून निर्घृण खून केला. घटनेची माहिती मिळताच तुळजापूर पोलीस आणि स्थानिक गुन्हे शाखेच्या पथकाने तपासाची चक्रे फिरवली.
जलदगती तपास व आरोपींची अटक
तपासादरम्यान, समाधान संपत शिंदे (रा. धारूर) यानेच हा खून केल्याची गोपनीय माहिती पोलिसांना मिळाली. तो सध्या कोल्हापूर जिल्ह्यातील कागल येथे लपल्याचे निष्पन्न झाले. त्या आधारे स्थानिक गुन्हे शाखेच्या एका पथकाने कोल्हापुरात जाऊन समाधान शिंदे याला ताब्यात घेतले. चौकशीत त्याने गुन्ह्याची कबुली दिली.
याच गुन्ह्यातील दुसरा आरोपी गणेश घाटशिळे (रा. सिंदफळ) यास तुळजापूर परिसरातून स्थानिक गुन्हे शाखेच्या दुसऱ्या पथकाने ताब्यात घेतले. अशा प्रकारे पोलिसांनी अवघ्या 24 तासांत दोन्ही आरोपींना अटक करून खून प्रकरणाचा छडा लावला.
पोलीस दलाची उल्लेखनीय कामगिरी
या यशस्वी कारवाईसाठी पोलीस अधीक्षक संजय जाधव, अपर पोलीस अधीक्षक गौहर हसन, तसेच तुळजापूरचे उपविभागीय पोलीस अधिकारी निलेश देशमुख यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार आणि त्यांच्या सहकाऱ्यांनी अथक प्रयत्न केले.
ही महत्त्वाची कारवाई सहायक पोलीस निरीक्षक सुदर्शन कासार, सचिन खटके, वली उल्ला काझी, पोलीस हवालदार विनोद जानराव, शौकत पठाण, प्रकाश औताडे, जावेद काझी, दयानंद गादेकर, पोलीस नाईक नितीन जाधवर, बबन जाधवर, पोलीस अंमलदार योगेश कोळी, अशोक कदम, सुनील मोरे (TAW) तसेच चालक मेहबूब अरब, रत्नदिप डोंगरे आणि नितीन भोसले यांनी केली.
पुढील कार्यवाही सुरू
दोन्ही आरोपींना न्यायालयात हजर करण्यात आले असून पुढील तपास सुरू आहे. या जलदगती तपासामुळे तुळजापूर पोलिसांचे सर्वत्र कौतुक होत आहे.
0 Comments